Finca Martelo er eitt hinum stórkostlegu vínum La Rioja Alta, vín frá búgarðinum Torre de la Ona sem ætlað er að vera samtímaútgáfa af rauðu Rioja-víni. Þetta er fjórði árgangurinn sem framleiddur er af víninu en 2016 er jafnframt einhver besti árgangur í Rioja í langan tíma, heitt og þurrt sumar og í lokin mild haust sem tryggði að þrúgurnar gátu náð fullkomnum þroska. Uppistaðan í blöndunni er auðvitað Tempranillo en það er smá hlutfall af Mazuelo, Garnacha og hinni hvítu Viura allt af gömlum vínvið í Rioja Alavesa. Vínið liggur lengi á tunnum og það er fyrst og fremst notuð amerísk eik (80%). Liturinn er djúpur, dimmrauður en farinn að sýna byrjandi þroska, ilmurinn er sömuleiðis farinn að þróast, eik og ávöxtur að renna samn í eina heild, leður, sætur balsamviður og sedrus sem hjúpa dökkan og kryddaðan berjakjarna, tannín fínleg en mikið undirliggjandi afl og lengd. Elegant og flott vín.
5.399 krónur. Frábær kaup. Þetta er vín sem fellur afbragðsvel að villibráð.
-
10
