Dominio de Atauta er toppvínið frá samnefndu vínhúsi í Ribera del Duero . Atauta framleiðir vín í nútímalegum stíl og hefur í sinni eigu eða umsjón tæpa 55 hektara af ekrum sem flestar eru í um þúsund metra hæð yfir sjávarmáli uppá spænsku hásléttunni. Atauta státar af því að vera með vínvið frá tímabilinu áður en rótarlúsin phylloxera lagði evrópska vínrækt í rúst. Slíkur vínviður er einstaklega sjaldgæfur enda þurfti evrópsk vínrækt nærri því eins og hún lagði sig að græða vínviðinn á amerískar rætur er voru ónæmar fyrir lúsinni.
Þetta er hreint Tinto Fino (Tempranillo) og eru ekrurnar í um þúsund metra hæð yfir sjávarmáli, vínviðurinn 100-140 ára gamall. Liturinn er dimmrauður og ávöxturinn sömuleiðis, kryddað, þarna eru lavender, fjólur og fennelfræ, kakóbaunir, tannín þétt og mjúk, míneralískt. Gefið góðan tíma, umhellið helst. Fínlegt og frábært Ribera-vín í nútímalegum stíl.
5.690 krónur. Með nauti eða lambi, gjarnan grilluðu.
-
10
