Kínversk matargerð hefur öðlast sitt eigið líf vestan hafs og þar hefur þróast afbrigði hennar sem blandar saman þessum tveimur menningarheimum og er í raun orðin að því sem margir tengja við „kínverskan“ mat. Þessi uppskrift er í þeim stíl. Hér er notað grísakjöt en það má allt eins nota kjúklingakjöt.
- 500 g grísakjöt í bitum
- 1 dl akasíuhunang
- 1 dl mild sojasósa
- 1 dl vatn
- 4-5 hvítlauksrif, pressuð
- 3 sm engiferrót, rifin
- 1 tsk chiliflögur
- 2 msk Maizena
- 2 vænar msk sesamfræ
Byrjið á því að þurrista sesamfræin á heitri pönnu þar til að þau taka að dökkna, án þess þó að brenna.Geymið.
Setjið vatn, soja, hunang, hvítlauk, engiferr, chiliflögur og maizena í skál og pískið vel saman.
Hitið olíu á pönnunni og brúnið kjötbitana. Hellið sósunni út á pönnunna og sjóðið hressilega í nokkrar mínútur þar til að sósan fer að þykkna. Lækkið hitann, hellið sesamfræjunum yfir, blandið saman og látið malla í um 10 mínútur.
Berið fram með hrísgrjónum og gufusoðnum gulrótum og brokkolí.
Með þessu hentar gott nýjaheimshvítvín best, t.d. Cono Sur Viognier.
