Spænskar kjötbollur með krydduðum kartöflum

Kjötbollur eru alltaf vinsælar. Í síðustu viku vorum við með uppskrift að ítölskum kjötbollum. Í kjölfarið áskotnaðist mér dýrindis uppskrift að spænskum kjötbollum frá þeim Jóhannesi og Birnu í Hlíðartúni. Það er smá handavinna í kringum þetta en það erfiðasta er að þurfa að bíða eftir að rétturinn kemur á borðið. En hann er svo sannarlega umstangsins virði.

Þetta þarf í uppskriftina fyrir fjóra

Kjötbollurnar

  • 500 gr nautahakk
  • 25 gr rasp (helst heimatilbúið úr grófu brauði)
  • 25 gr Parmesanostur, rifinnn
  • 1 egg
  • 1 lítill fínsaxaður laukur
  • 1 “solo” hvítlaukur eða 2-3 hefðbundnir hvítlauksgeirar, fínsaxaðir
  • 2 msk ólífuolía
  • 1 dl rauðvín
  • 1 dós saxaðir tómatar
  • 1 handfylli ferskt basil

Krydduðu kartöflurnar

  • 1 kg kartöflur
  • 1 msk ólívuolía
  • 2 feitir “solo” hvítlaukar eða 4-5 hvítlauksgeirar, fínsaxaðir
  • ½ saxaður rauður chili, fræhreinsaður
  • ¼ tsk paprikuduft
  • (eða 2 msk mjög fínsöxuð rauð paprika – gefur flottara útlit og ágætt bragð)
  • 1 dl hvítvín
  • 5 stk grófsaxaðir tómatar
  • 4 stönglar timjan

Blandið kjöti, raspi, parmesan, lauk, hvítlauk og eggi saman í skál og hnoðið í litlar bollur. Gott er að nota ísskeið við þetta. Bollurnar ættu að verða um 24.

Steikið bollurnar nokkrar í einu í olíu, takið af pönnunni og geymið á eldhúspappír. Hellið rauðvíninu yfir og látið sjóða á meðan þið leysið upp skófarnar. Bætið við söxuðum tómötum úr dós, svolitlu viðbótar vatni og dreifið basil blöðunum yfir. Setjið nú bollurnar aftur á pönnuna og látið malla (undir loki) í 30 mínútur. Saltið og piprið eftir smekk.

Skerið kartöflurnar í stóra teninga eða í tvennt ef þið eruð með nýtt smælki. Steikið þær í olíu í nokkrum umferðum nema þið séuð með þeim mun stærri pönnu og leggið á eldhúspappír eftir steikinguna.

Hitið olíu á annarrin pönnu, bætið við, lauk, hvítlauk og chili og steikið í 7 mínútur. Stráið paprikuduftinu eða smátt saxaðri papriku yfir og bætið loks við hvítvíninu, grófsöxuðu tómötunum og timian. Látið malla í um 15 mínútur. Þessari sósu er þá hellt yfir forsteiktu kartöflurnar.

Borið fram með grænu salati.

Með þessu spænskt Rioja-vín, t.d. El Coto eða jafnvel rauðvín frá Portúgal til dæmis Crasto.