Það er fátt betra en ferskar kryddjurtir og þessi blanda á einstaklega vel við góða, grillaða nautasteikk. Best er að nota vel fitusprengdan og stóran bita, s.s. Ribeye og elda við nokkuð vægan hita.
Kryddjurtasósa
- 1 væn lúka basil
- 1 væn lúka flatlaufa steinselja
- 2 msk estragon
- 2 msk timjan
- 2 msk rósmarín
- 3 hvítlauksgeirar
- 2,5 dl ólívuolía
- Maldon-salt og nýmulinn pipar
Saxið kryddjurtirnar mjög fínt. Blandið saman ólívuolíu, pressuðum hvítlauk og salti og pipar. Blandið fínt söxuðum kryddjurtunum saman við. Látið standa í að a.m.k. klukkustund áður en á að nota til að brögðin nái að olían nái að að taka í sig bragðið úr kryddjurtunum.
Grillið kjötbitann fyrst á háum hita á öllum hliðum. Lækkið hitann verulega með því að slökkva á miðjubrennara og lækka hitann á hliðarbrennurum. Grillið áfram undir loki þar til að kjötið hefur náð þeirri eldun sem þið sækist eftir. Það er líka hægt að elda kjötið í ofni.
Látið kjötbitann standa í um 5-10 mínútur. Skerið niður og setjið á fat. Hellið 2-3 msk. af sósunni yfir og raðið grilluðum rauðlauk í kring. Berið fram með t.d. kartöflum, fersku salati og restinni af sósunni.
Hér hentar gott ítalskt eða spænskt rauðvín vel, t.d. Il Poggione eða Finca Monasterio.
