Baba Ghanoush er einn af algengustu réttum Mið-Austurlanda og fastur liður á borðum hvort sem er í t.d. Líbanon eða Ísrael. Þetta er eggaldinsmauk með ólívuolíu sem er gjarnan borðað með grilluðu pítabrauði.
- 1 eggaldin
- 1 dl Tahini
- 3 hvítlauksgeirar
- 1 dl nýpressaður sítrónusafi
- 1 msk mjög fínt söxuð steinselja
- ½ tsk cummin
- 1 msk ólívuolía
- salt
- steinlausar svartar ólívur til skrauts
Stingið gaffli í eggaldinið á nokkrum stöðum og grillið á grilli eða í ofni þar til að hýðið er orðið svart og aldinkjötið byrjar að verða mjúkt. Það gæti tekið um 10-15 mínútur og mikilvægt er að snúa eggaldininu oft á meðan.
Setjið í eldfast form og bakið við 175 gráðu hita í um 15 mínútur. Leyfið að kólna aðeins og hreinsið hýðið af.
Setjið í skál og maukið með gaffli. Bætið Tahini, pressuðum hvítlauk og sítrónusafa út í ásamt cummin og blandið vel saman. Bragðið til með salti og viðbótar Tahini eða sítrónusafa ef þarf.
Setjið maukið í fallega skál og sléttið úr því með skeið. Hellið ólívuolíu og sáldrið steinseljunni yfir. Raðið svörtum ólívum meðfram skálbrúninni.
Það er sniðugt að bera Hummus fram samhliða.
