Grasker eru náskyld kúrbít og „Butternut Squash“ er algengt á þessum árstíma í grænmetisborðum stórmarkaða. Það er góð uppistaða í matarmikla og bragðgóða súpu sem er borin fram með hneturjómasósu.
- 1 stórt „Butternut“ grasker
- 1 laukur
- 1 lítill fennelbelgur
- 2 msk rifinn engiferrót
- 7 dl kjúklingasoð
- 2 dl kókosrjómi (Coconut Cream) eða kókosmjólk
- safi úr hálfri sítrónu
- ólífuolía
- smjör
- salt
Skerið graskerið í tvennt og kjarnhreinsið.Penslið skurðhliðina með smá ólífuolíu. Setjið á bökunarpappír á bökunarplötu með skurðhliðina niður. Setjið inn í 175 gráðu heitan ofn og bakið í um klukkustund. Takið graskerið út, það á að vera orðið mjög mjúkt. Leyfið því að kólna aðeins og hreinsið mjúkt ávaxtakjötið úr því.
Saxið laukinn. Skerið fennelbelginn niður, fyrst í tvennt óg síðan í bita.
HItið smjör í þykkum potti. Mýkið lauk, fennel og engifer á miðlungshita í 8-10 mínútur. Bætið þá graskerinu og kjúklingasoðinu saman við. Látið malla undir loki í 20 mínútur.Takið lokið af og leyfið að malla áfram í 10 mínútur.
Slökkvið á hitanum og hrærið kókosrjómanum saman við.
Maukið súpuna í matvinnsluvél. Blandið sítrónusafanum saman við og bragðið til með salti.
Setjið í skálar ásamt skeið af hneturjómasósu.
Hneturjómasósa
- 2 dl pecanhnetur
- 1 dós sýrður rjómi (18%)
- 1 msk heslihnetuolía (fæst t.d. í Lifandi markaði)
- klípa af Cayennepipar
Setjið Pecanhneturnar í eldfast fat og þurristi í ofni í átta mínútur við 175 gráður.
Maukið hneturnar í matvinnsluvél. Blandið hnetunum, sýrða rjómanum og heslihnetuolíunni saman. Bragðið til með Cayennepipar.
