Kjötbollur er hægt að gera á óendanlega vegu. Þetta eru klassískar ítalskar nautahakksbollur en hér bökum við þær í staðinn fyrir að steikja. Ricotta-ferskost má fá í ostaborðum t.d. í Hagkaup Kringlunni eða Búrinu en það tekur líka nokkrar mínútur að gera sinn eigin ricotta. Aðferðina má sjá með því að smella hér og við þurfum um hálfan skammt í þessa uppskrift.
- 800 g nautahakk
- 150 g ricotta
- 2 egg
- 1 lúka haframjöl
- 1 lúka fínsöxuð flatlaufa steinselja
- 2 msk fínsaxað ferskt óreganó
- 1 msk fennel
- 1 tsk chiliflögur
- salt og pipar
Blandið öllu varlega en vandlega saman í skál. Það er best að nota hendurnar. Mótið kjötbollur svipaðar og golfkúlur að stærð. Gott er að nota ísskeið til þess. Setjið smjörpappír á bökunarplötu og raðið bollunum á plötuna. Bakið í um 20-30 mínútur við 200 gráður.
Á meðan er sósan undirbúin.
- 4 dl tómatapassata (maukaðir tómatar)
- 1 dós heilir tómatar
- 1 laukur fínt saxaður
- 4-5 hvítlauksgeirar, saxaðir
- 1 lúka fínsaxað óreganó
- 1 /2 tsk chiliflögur
- ólífuolía
Hitið olíuna í þykkum potti. Mýkið laukinn og bætið hvítlauknum og chiliflögum saman við eftir nokkrar mínútur. Hellið næst hvítvíninu út í og látið malla með laukunum í nokkrar mínútur. Bætið passata og tómötum saman við ásamt óreganó. Látið malla á miðlungshita í um 15 mínútur.
Takið bollurnar úr ofninum og setjið varlega í pottinn ásamt vökvanum sem hefur lekið af þeim. Leyfið að malla áfram í 5-10 mínútur.
Berið fram með spaghetti og parmesan. Gott ítalskt rauðvín með t.d. Valpolicella.
Allar kjötbolluuppskriftirnar okkar má sjá með því að smella hér.
