Pares Balta Blanc de Pacs 2014

Pacs er lítið þorp í Katalóníu nánar tiltekið í Pénedes, suður af Barcelona. Þetta er samt varla þorp, meira húsaþyrping. Þarna í grennd er að finna flest þekktustu vínhús Pénedes og í Pacs býr Cusine-fjölskyldan sem rekur hið lífræna vínhús Pares Balta og framleiðir nokkur af bestu vínum Katalóníu.

Blanc de Pacs er lífrænt ræktað vín líkt og önnur frá Pares Balta, þetta er hvítvín úr þrúgunum Parellada, Macabeo (sem líka er þekkt undir nafninu Viura) og Xarello en það eru jafnframt þær þrúgur sem alla jafna eru notaðar í Cava-freyðivínin, sem einmitt koma frá þessu svæði.

Þetta hvítvín, sem er hið ódýrasta sem Pares Balta framleiðir, er ávallt ferskt og gott en 2014 er með betri árgöngum sem að við höfum smakkað. Mikil, sumarleg blómaangan, melónur og sítrus, örlítið grösugt, sem verður meira áberandi þegar vínir loftar sig. Ferskur og mikil ávöxtur í munni, vínið þurrt en ávöxturinn með sætum þroska. Virkilega flott sumarvín.

1.999 krónur. Frábær kaup.

Deila.