Guigal er eitt allra besta ef ekki það besta vínhús Rhone-dalsins og það er ekkert slakað á gæðunum þegar Cotes du Rhone er annars vegar.
Cotes du Rhone er samnefnari yfir vín sem framleidd eru úr þrúgum sem geta verið ræktaðar um nær allan Rhone-dalinn. Þetta er ansi stórt svæði, teygir sig yfir 200 kílómetra svæði frá Vienne í norðri til Avignon í suðri. Vínin geta verið rauð, hvít eða rósavín og árlega eru framleiddar rúmlega 400 milljón flöskur undir merkjum þessa AOC-svæðis. Það gefur augaleið að það getur verið ansi misjafn sauðurinn í þetta stórum hópi, bæði hvað varðar stíl vínanna og gæði.
CDR-vínið frá Guigal eru alla jafna með bestu vínunum sem gerð eru í þessum AOC-flokki og stíllinn er meira í anda og stíl vínanna frá Norður-Rhone þar sem Syrah-þrúgan er í aðalhlutverki (um helmingur af blöndunni) heldur en flestra CDR-vína sem sækja meira í suðurhlutann. Dimmrauður ávöxturinn einkennist af skógarberjum, kirsuberjum, lyngi og kryddjurtum, vínið er fókuserað, þéttriðin tannísk uppbygging, þetta er vín sem alveg þolir smá geymslu þó það sé ljúffengt núna.
2.999 krónur. Frábær kaup. Með lambi og mildri villibráð.
-
9
