Sörur eru með vinsælustu jólakökunum. Þær eru kannski ekki þær allra einföldustu í bakstri en þó er auðveldara að gera Sörur en margur hyggur.
- 3 ½ dl flórsykur
- 200 g möndlur
- 3 eggjahvítur
Krem
- ¾ dl sykur
- ¾ dl vatn
- 3 eggjarauður
- 100 g smjör
- 2 msk kókomalt
Súkkulaðihjúpur
- suðusúkkulaði eða annað súkkulaði að vild
Sigtið flórsykurinn og brytjið möndlurnar niður.
Stífþeytið eggjahvíturnar.
Blandið möndlum og flórsykri varlega saman við eggjahvíturnar. Bakið við 180 í 10 mín. Kælið.
Þá er komið að því að gera kremið. Sjóðið saman sykur og vatn þar til að úr verður síróp, þetta tekur um 8-10 mínútur.
Þeytið eggjarauðurnar vel saman, hellið síropinu varlega saman við eggjarauðurnar og haldið áfram að þeyta á meðan. Bætið smjörinu við (það þarf að vera volgt og mjúkt) og þar á eftir kakói.
Setjið kremið á kaldar kökurnar og stingið þeim í frysti. Þegar kökurnar með kreminu eru orðnar vel kaldar og harðar eru þær hjúpaðar með bráðnu súkkulaðinu.
Ef þið viljið mikið krem á Sörurnar má tvöfalda kremmagnið í uppskriftinni að ofan.
Best er að geyma kökurnar í frysti og taka þær út skömmu áður en bera á þær fram.
