Santa Cristina er Toskanavín frá Antinori sem hefur tekið miklum breytingum í gegnum árin. Þegar vínið kom fyrst á markað árið 1946 var það skilgreint sem Chianti Classico. Það breyttist á níunda áratugnum og sömuleiðis hefur Merlot-þrúgan bætst við í blönduna ásamt Sangiovese.
Stíllinn hefur sömuleiðis breyst og nú eru fleiri en eitt vín selt undir nafninu Santa Cristina. Santa Cristina Toskana IGT hefur ávallt verið ávaxatradrifið vín en líklega aldrei meira en nú á síðustu árum og endurspeglar þar með þær breytingar sem hafa orðið í ítalskri víngerð.
Í dag er Santa Cristina heillandi, nútímalegt Toskana-vín með björtum og miklum kirsuberjaávexti, vott af þroskuðum plómum, blómum og kryddi. Í munni er vínið ungt með góðri fyllingu og mjúkum tannínum.
Þetta er vín fyrir flesta pastarétti með kjötsósu, pizzu og fleira.
1.899 krónur. Góð kaup.
