Þrátt fyrir að margir tengi ratatouille við Disney-kvikmynd í seinni tíð er engin ástæða til að gleyma hinum suður-franska grænmetisrétti sem sögupersóna myndarinnar er nefnd eftir. Ratatouille á ættir sínar að rekja til gömlu Okkitaníu sem er það svæði sem myndar Suður-Frakkland í dag en Oc-ið í til dæmis heitinu Languedoc vísar til þessa forna héraðs sem á tímum Rómverja var nefnt Aquitania og náði frá núverandi landamærum Spánar austur fyrir Mónakó.
Ratatouille er einhver þekktasti réttur franska Miðjarðarhafssvæðisins og hráefnið er nokkurn veginn alltaf það sama: Eggaldin, kúrbítur, paprika, tómatar, hvítlaukur og að sjálfsögðu ólívuolía.
Hráefni:
- 1 bufflaukur, grófsaxaður
- 2 eggaldin
- 3 kúrbítar
- 2 rauðar paprikur
- 4 tómatar
- 3 hvítlauksgeirar
- 2 stönglar timjan
- 1 dl ólívuolía
Aðferð:
- Skerið grænmetið (eggaldin, kúrbít, papriku og tómata) í teninga sem eru um 1 sm á hverja hlið.
- Hitið olíuna á pönnu. Mýkið laukin ásamt timjanstönglunum. í um fimm mínútur.
- Bætið við eggaldin og papriku og steikið í fimm mínútur til viðbótar.
- Sjóðið vatn í potti og sjóðið kúrbítsteningana í 2-3 mínútur.
- Bætið kúrbít á pönnuna og eldið í 5 mínútur enn.
- Bætið tómatateningum og pressuðum hvítlauk út á pönnuna. Setjið lok á pönnuna og eldið í tíu mínútur.
- Bragðið til með salti og pipar.
Ratatouille er frábært meðlæti með til dæmis lambakjöti.
