Það er svolítið grískur fílingur í þessum kjötbollum með myntunni og kanilnum. Risottóið hins vegar ítalskt og pestóið með kóríander og engifer kalifornískt.
Kjötbollur
- 500 g lambahakk
- 1 rauðlaukur, fínsaxaður
- 2 lúkur fersk mynta, fínsöxuð
- 1 dl heimatilbúin brauðmylsna
- 1 egg
- 1/2 tsk kanil
- salt og pipar
Blandið öllum hráefnunum vel saman og mótið litlar kjötbollur. Hitið olíu á pönnu og steikið kjötbollurnar í 10-12 mínútur eða þar til þær eru fulleldaðar.
Risotto með rauðvíni
- 2,5 dl risottogrjón (Arborio eða Carnarolo)
- 1 laukur, saxaður
- 3-4 hvítlauksgeirar, saxaðir
- 1 dl rauðvín
- 7 dl kjúklingasoð
- 2 dl nýrifinn Parmesan-ostur
Hitið ólívuolíu á pönnu ásamt 1 msk af smjöri. Mýkið laukinn og hvítlaukinn á miðlungshita. Bætið grjónunum út á og blandið vel saman við laukinn. Hitið grjónin á pönnunni í 2-3 mínútur og hellið þá rauðvíninu út á og leyfið að sjóða alveg niður. Þá er sjóðheitu kjúklingasoði bætt saman við grjónin, ausu og ausu í einu, þar til að þau eru fullsoðin, það tekur um 20 mínútur. Slökkvið á hitanum og bætið rifna ostinum saman við, bragðið til með salti og pipar.
Kóríanderpestó með engifer
- 1 stórt búnt kóríander
- 3 sm bútur af engiferrót
- 1 msk sesamfræ, þurrristuð á pönnu þar til þau „poppa“
- 1 chilibelgur
- 1,5 dl ólívuolía
- salt og pipar
Blandið öllu saman í matvinnsluvél.
Setjið kjötbollurnar á diska ásamt risotto og pestó. Berið fram með góð Cabernet Sauvignon frá t.d. Chile eða Argentínu.
