Þessi uppskrift að hreindýrasteik kemur frá Úlfari Finnbjörnssyni og er að finna í bók hans „Stóru bókinni um villibráð“ sem nýlega kom út.
- 4 x 200 g hreindýrasteikur
- salt og nýmalaður pipar
- 2 msk. olía
- 30 g þurrkaðir villisveppir, malaðir í kaffikvörn eða matvinnsluvél
- 1 dl portvín
- ½ dl brandí
- 2½ dl rjómi
- ½ msk. nautakjötskraftur
- sósujafnari
Gljáður skalottlaukur
- 8-12 skalottlaukar
- ½ l vatn
- 2 msk. olía
- 4 msk. sykur
- 3 timjangreinar
- 2 lárviðarlauf
- 2 msk. balsamedik
- 1 dl rauðvín
- salt og pipar
Kóngssveppir
- 4-6 kóngssveppir, skornir í báta
- 1-2 msk. smjör
- salt og nýmalaður pipar
Kryddið hreindýrasteikur með salti og pipar og steikið í olíu á vel heitri pönnu í 2 mínútur á hvorri hlið. Takið steikurnar af pönnunni og setjið í 180°C heitan ofn í 5-7 mínútur. Setjið sveppamulning á sömu pönnu ásamt portvíni og brandíi og sjóðið vínið niður um ¾. Bætið rjóma og kjötkrafti í sósuna og þykkið með sósujafnara. Smakkið til með salti og pipar.
Gljáður skalottlaukur
Setjið skalottlauk og vatn saman í pott, þannig að rétt fljóti yfir laukinn. Kveikið undir en takið pottinn af hellunni um leið og suðan kemur upp. Skrælið þá laukinn og steikið í olíu á pönnu þar til hann er orðinn fallega brúnn. Bræðið sykur á pönnu og látið hann brúnast. Bætið timjangreinum, lárviðarlaufum, balsamediki, rauðvíni, salti og pipar á pönnuna og sjóðið vökvann niður um ¾.
Kóngssveppir
Steikið sveppi upp úr smjöri á vel heitri pönnu í 2-3 mínútur og kryddið með salti og pipar.
Með hreindýrasteik á fátt betur við en gott Bordeaux, hér mætti t.d. bjóða fram Chateau d’Agassac.
