Það tengja margir osta og rauðvín ósjálfrátt saman. Staðreyndin er hins vegar sú að oft henta önnur vín betur með ostum en rauðvín. Í mörgum tilvikum eru hvítvín besti kosturinn og púrtvín geta sömuleiðis verið frábær kostur með góðum ostum.
Púrtvín eru oftast borin fram með eftirréttum og ekki síst ná þau að spila með eftirréttum úr súkkulaði sem eru flestum öðrum vínum ofviða. En rétt eins og ostar eru ekki allir eins eru púrtvín það ekki heldur.
Einföldustu púrtvínin eru kölluð Ruby og oft hafa þau ekki verið geymd lengur en ár á tunnu. Þau eru yfirleitt ódýr og ávöxturinn er enn ríkjandi í bragði þeirra auk þess sem áfengið hefur ekki runnið mikið saman við vínið. Sé vínið geymt í nokkur ár í viðbót á tunnu er það kallað Fine Old Ruby eða jafnvel Vintage Character Port.
Eftir því sem vínið er geymt lengur á tunnu breytir það um lit, rauði liturinn tekur á sig brúna tóna og ávöxturinn víkur fyrir hnetum og möndlum. Þessi púrtvín eru kölluð Tawny með vísun í litarhátt þeirra. Skilyrði fyrir því að púrtvín megi skilgreina sem Tawny er að það hafi einungis verið látið þroskast á eikartunnum.
Púrtvín, sem eru tekin af tunnu eftir fjögur til sex ár og sett á flösku, eru kölluð Late Bottled Vintage Port eða LBV. Þau eru mun ódýrari og jafnframt minni vín og þurfa ekki lengri geymslu áður en þeirra er neytt. Yfirleitt eru mjög góð kaup í LBV-vínum frá virtu púrtvínshúsi.
Tawny-púrtvín frá einum tilteknum árgangi eru kölluð Colheitas og eru þegar vel lætur með ljúffengustu púrtvínum sem hægt er að finna
Bestu árin eru afbragðsvín tekin af tunnu eftir tvö ár og sett á flöskur. Þetta eru yfirleitt dýrustu púrtvínin og eru kölluð árgangspúrtvín eða vintage port, þar sem um vín frá tilteknum árgangi er að ræða en ekki blöndu.
Það er hægt að fá ágætis púrtvín í flestum flokkum hér. Púrvínshús sem flestir þekkja er Sandeman’s sem auðþekkjanleg eru vegna skikkjuklædda mannsins á flöskumiðanum sem hefur verið tákn Sandeman um aldabil. Það var Skoti, George Sandeman, sem stofnaði vínhúsið á sínum tíma og það er þekkt fyrir bæði púrtvín og sérrí.
Old Invalid Port er einfalt, þægilegt og ávaxtaríkt púrtvín sem hentar vel með flestum ostum og Old Tawny Port er hnetukennt og gott tawny.
Eldri Tawny er einnig hægt að fá frá Cockburn’s og Graham’s.
Þá er Late Bottled Vintage frá Osborne ágætis kostur með flestum ostum, þykkt og kröftugt púrtvín.
Púrtvín passa sérstaklega vel með gráðaostum, bæði hinum íslenska sem glæsilegum frönskum, breskum og ítölskum á borð við Roquefort, Stilton og Gorgonzola.
Einnig má nefna Brie og Camembert og þá er gott að hafa sultu með, t.d. rifsberjasultu.
Þá eru þau mjög góð – ekki síst tawny púrtvín – með þurrum hörðum ostum s.s. Parmigiano.
