Camus hefur sérstöðu hvað tvennt varðar. Það er stærsta koníaksfyrirtækið, sem enn er rekið sem fjölskyldufyrirtæki. Camus-fjölskyldan hefur framleitt koníak allt frá árinu 1863, er fyrirtækið var stofnað af Jean-Baptiste Camus og er núverandi aðalstjórnandi fyrirtækisins, Jean-Paul Camus, fulltrúi fjórðu kynslóðarinnar. Bróðir hans, Philippe, er yfirmaður Frakklandsdeildar fyrirtækisins.
Þá hefur fyrirtækið um árabil verið ráðandi á heimsmarkaði hvað varðar sölu á hágæðakoníaki eða í flokkunum fyrir ofan VSOP, þ.e. Napoléon, XO, Extra og rándýrum sértegundum sem aðallega er að finna í tollfrjálsum verslunum. Af því leiðir einnig að mikilvægustu markaðir fyrirtækisins eru ekki í Evrópu fyrst og fremst, þar sem uppistaða neyslunnar er VS-koníak, heldur í Asíu, þar sem mikil sala er í dýru koníaki þótt reynslan sýni að hættulegt geti verið að treysta alfarið á asíska markaði fyrir lúxusafurðir.
Í upphafi aldarinnar var Rússland einn allra mikilvægasti markaður fyrirtækisins og hafði sá markaður verið byggður upp af annarri kynslóð fjölskyldunnar, þeim Gaston og Edmond Camus. Var koníaks þeirra neytt við hirð Rússakeisara. Þessi markaður varð að engu við byltinguna. Með árunum tókst hins vegar að byggja upp viðskiptin við Rússland (eða Sovétríkin eins og ríkið hét þá) að nýju og seldi fyrirtækið mikið af brenndum vínum og koníaki þangað en fékk á móti einkaleyfi til innflutnings á Moskovskaya-vodka til Frakklands. Enn í dag á fjölskyldan í töluverðum viðskiptum við Rússa.
Það var hins vegar Michel Camus í næstu kynslóð, sem mótaði þá stefnu er fyrirtækið hefur fylgt til þessa, það er að einbeita sér að sölu og framleiðslu á hágæðakoníaki. Michel var á stöðugum ferðalögum um heiminn til að kynna koníakið sitt og sannfærðist um að besta færi fyrirtækisins til markaðssóknar væri að einbeita sér að efri gæðaflokkunum þar sem koníaksrisarnir væru það öflugir á öðrum sviðum.
Hann lagði mikla áherslu á tollfrjálsa sölu í fríhöfnum sem var ört stækkandi markaður upp úr miðri öldinni. Stefna Michels var að framleiða minna en betra og vonast til að fólk myndi með tímanum læra að meta þá stefnu. Hann virðist hafa veðjað á réttan hest því undanfarin ár er hágæðakoníak sá flokkur er sala eykst hlutfallslega mest í.
Camus hefur aðsetur sitt í miðborg Cognac. Fjölskyldan á vínekrur í Borderies, Grand Champagne og Fine Champagne og eru vínin þaðan eimuð í fjórum eimingarhúsum, sem eru mjög mismunandi að stærð. Hið minnsta stendur við Château d’Uffaut í Grande Champagne þar sem fjölskyldan á vínekrur.
Jean-Paul Camus dregur enga dul á að sérstaða Camus-koníaks byggist á því að í blöndurnar sé notað mikið af koníaki frá Borderies-svæði. Það er minnsta svæði koníakhéraðsins og vín þaðan mjög eftirsótt þar sem Borderies-koníök gefa mikla þyngd og fyllingu, sem kemur hinni endanlegu koníaksblöndu til góða.
Camus-fjölskyldan á rætur sínar í Borderies og þar er einnig að finna ættarsetrið Plessis-höll. Tveir þriðju af vínekrum fjölskyldunnar eru í Borderies en um þriðjungur í Grand og Fine Champagne. Vín frá öðrum svæðum, sem notuð eru í ódýrari blöndur, eru aðkeypt. Jean-Paul undirstrikar að sérstaða fyrirtækisins felist í fjölskyldurekstrinum og þeirri tryggingu sem hann veiti. Galdurinn á bak við hágæðakoníak sé einmitt að um áratugaskeið hafi verið komið upp birgðum af góðum, eldri koníökum er nota megi til að gera hina flóknu lokablöndu.
Jean-Paul sér sjálfur um að blanda öll koníök Camus og þegar sem táningur hóf hann að nema þá tækni af föður sínum Michel. Um nokkurra ára skeið hafa synir hans tveir, Jean-Baptiste og Cyril, búið sig undir það að taka við fyrirtækinu og gegna nú æðstu stöðum þess.
