Þetta er sumarlegt og fínt salat þar sem að perur eru soðnar í Amarulalíkjör.
Hráefni
- 625 ml Amarula
- 125 ml vatn
- 3 msk sykur
- 1 tsk svört piparkorn
- ½ tsk salt
- 2 negulnaglar
- 2 perur
- 1 poki „baby leaf“ salat
- 150 g gráðaostur (kurl)
- baunaspírur
- balsamikedik, soðið niður
Amarulalegnar perur
Blandið saman Amarula, vatni, sykri, pipar, salti og negulnöglum í potti. Leyfið suðunni að koma upp og sjóðið í um 8 mínútur. Byrjið á háum hita og hrærið vel í á meðan sykurinn er að leysast upp en lækkið síðan hitann.
Skrælið perurnar en skiljið stöngulinn eftir. Setjið perurnar í vökvann, látið þær liggja á hlið þannig að vökvinn þekji þær nær alveg. Snúið þeim reglulega þannig að þær eldist og marinerist jafnt. Sjóðið í um 5 mínútur eða þar til að þær byrja að gefa eftir þegar að stungið er í þær með hníf. Leyfið þeim að kólna í leginum í um 20 mínútur. Snúið þá við og látið liggja í 20 mínútur til viðbótar.
Takið úr leginum. Skerið í tvennt, kjarnhreinsið og skerið síðan í grófar sneiðar. Geymði.
Salat
Sjóðið 1 dl af góðu balsamikediki niður um 2/3
Setjið salatblöðin á 4 diska eða eitt stórt fat. Kurlið gráðaostinn yfir og raðið síðan perunum yfir og þá baunaspírur. Hellið balsamikedikinu yfir og berið fram.
