Fennel er grænmeti sem er allt of lítið notað hér á landi. Það er hins vegar magnað, ekki síst þegar það hefur verið grillað eða steikt. Þetta salat er magnað t.d. með góðri nautasteik.
- 2 fennelbelgir
- 2 kúrbítar
- 1/2 sítróna, safinn pressaður og börkurinn rifinn
- 1 lúka basillauf, söxuð
- 1 lúka grófrifinn parmesan
- 1 lúka óreganólauf, söxuð
- ólífuolía
Skerið endana af fennelbelgjunum og rífið af ystu blöðin ef ykkur líst ekki á þau. Skerið síðan í tvennt á lengdina og skerið síðan niður þunnt á lengdina.
Skerið kúrbítana niður í frekar þunnar skífur.
Veltið fennel og kúrbít upp úr ólífuolíu í sitt hvorri skálinni. Saltið og piprið.
Grillið í grillkörfu. Það er best að byrja á fennelinum, hann þarf mun lengri tíma. Grillið þar til að hann er orðinn mjúkur. Grillið næst kúrbítssneiðarnar.
(Í sjálfu sér er alveg hægt að gera þetta á pönnu líka. Þið fáið bara ekki „grilláferðina“. Mýkið fyrst fennel á pönnu og síðan kúrbít.)
Setjið fennel og kúrbít í skál. Blandið sítrónusafa og sítrónuberki saman við. Þá rifnum Parmesan-ostinum. (rífið hann á grófa hlutanum á rifjárninu). Þá er kryddjurtunum bætt saman við og loks vænni skvettu af ólifuolíu. Bragðið til með salti og pipar ef þarf.
Berið strax fram.
