Þrúgan Sauvignon Blanc er ekki mjög algeng í vínum frá Argentínu, hvítvínin þaðan eru oftast úr annaðhvort hinni frönsku Chardonnay eða þá Torrontes, sem er einskonar þjóðarþrúga Argentínu. Sauvignon Blanc frá Argentínu er oft „franskari“ en t.d. vín úr sömu þrúgu sem framleidd eru handan Andes-fjalla í Chile.

Það segir ákveðna sögu að þetta vín heiti Pinot Gris. Það er þýskt og hið þýska nafn þrúgunnar er Grauer Spatburgunder. Þetta er hins vegar greinilega vín sem er framleitt í stíl sem á að vera meira alþjóðlegur en þýskur enda bjóða aðstæður í Baden, syðsta vínræktarhéraði Þýskalands upp á að menn leiki sér með stíla.

Þrúgan Chenin Blanc er frönsk að uppruna og er þar fyrst og fremst ræktuð í héraðinu Loire, m.a í Vouvray og Anjou. Það eru hins vegar líklegra að neytendur rekist á hana í suður-afrískri útgáfu. Chenin Blanc, sem einnig er kölluð Steen í Suður-Afríku, er útbreiddasta þrúgan þar í landi.

Vínin með fuglamyndunum frá Hardy’s voru einhver fyrstu áströlsku vínin sem hér sáust fyrir einum tveimur áratugum síðan. Hardys-vínin hurfu síðan af markaðnum um skeið en eru nú komin aftur.

Bodegas Norton er vínhús í Mendoza-héraði í Argentínu, sem nú er í eigu austurrísku Swarowski-fjölskyldunnar, sem þekkt er fyrir kristalsframleiðslu sína.

Austurrísk hvítvín geta verið yndislega fersk og arómatískt og þetta vín frá Hubert Sandhofer í Burgenland svíkur ekki unnendur slíkra vína.

Vín úr þrúgunni Pinot Gris frá Alsace geta tekið á sig margvíslegar myndir. Stundum eru þau létt og fersk, stundum feit með sætu. Þetta er vín sem er nær því að falla í síðarnefnda flokkinn.

Vínin frá Beaujolais voru lengi með mestu seldu vínum hér á landi en það er löngu liðin tíð. Það er hins vegar fyllsta ástæða til að endurnýja kynnin og láta ekki slæmar minningar af Beaujolais Nouveau spilla fyrir. Bestu vín héraðsins eru kennd við einstök þorp og eitt það helsta heitir Morgon.

Bodegas Roda í bænum Haro í Rioja er ungt vínhús sem byggt var upp frá grunni eftir stofnun 1987 í stað þess að byggja á gamalgrónum ekrum. Markmiðið var að gera vín í hæsta gæðaflokki og var gerð mikil leit að svæðu á undirsvæðunum Rioja Alta og Rioja Baja þar sem hægt væri að finna kjöraðstæður.

Cloudy Bay er vínið sem kom Sauvignon Blanc frá Nýja-Sjálandi og svæðinu Marlborough á kortið þegar fyrsta vínið kom á markað fyrir 25 árum. Það er enn með bestu vínhúsum Nýja-Sjálands og árgangurinn 2009 er hreinasta afbragð.