Pizza með skinku og sveppum er eitt. Pizza með ítalskri hráskinku (Prosciutto) og Portobello og Porcini-sveppum annað. Ef þið finnið ekki ítölsku sveppina ferska má notaða þurrkaða Porcini eða bara einfaldlega íslensku sveppina.
- 1 skammtur pizzadeig
- tómata passata (ítalskt tómatamauk)
- ítölsk Prosciuotto-skinka
- Portobellosveppur
- Porcinisveppir
- 2 hvítlauksgeirar, fínsaxaðir
- 1-2 mozzarellakúlur
- ferskt basil
- þurrkað óreganó
- ólífuolía
Skerið sveppina í litlar sneiðar. Steikið í olíu í 1-2 mínútur ásamt hvítlauknum.
Fletjið deigið út og smyrjið með tómatamaukinu. Kryddið með óreganó. Skerið mozzarellakúlurnar í sneiðar og dreifið um botninn. Raðið skinkusneiðunum yfir og dreifið loks sveppunum yfir.
Bakið við 225-250 gráður (eins mikið og ofninn ræður við) þar til að botninn er orðinn stökkur og osturinn bráðnaður. Hellið örlitlu af hágæða ólífuolíu yfir ásamt nokkrum söxuðum basilblöðum.
