Kjötbollurnar eru gerðar með grísku jógúrti og Sambal Oelek sem er kryddmauk sem er mikið notað í suðaustur-asískri matargerð. Með þessu er síðan sósa með kúrbít, sítrónu og osti. Ágætt er að nota pasta á borð við penne.
- 600 g nautahakk
- 2 egg
- 3 msk grísk jógúrt
- 2 msk Sambal Oelek
- salt og pipar
Blandið saman og mótið litlar kjötbollur. Hitið smjör á pönnu og steikið bollurnar. Takið af pönnunni og geymið í fati í ofni við 150 gráður. Þannig haldast þær heitar og eldast í gegn.
- 1 vænn laukur, saxaður
- 2 hvítlauksgeirar, saxaðir
- 2 meðalstórir kúrbítar, skornir í litla bita
- 1 búnt flatlaufa steinselja, fínsaxað
- rifinn börkur af einni sítrónu og sítrónusafinn
- 1 dós sýrður rjómi
- 1 poki Gratínostur
Byrjið á því að mýkja lauk og hvítlauk í smjöri á sömu pönnu og kjötbollurnar voru steiktar á. Bætið kúrbítnum út á og steikið 4-5 mínútur. Bætið nú sítrónuberkinum, sítrónusafanum og helmingnum af steinseljunni saman við. (Ekki sakar ef þið eigið smá skvettu af hvítvíni til að setja á líka). Hrærið saman og látið malla í nokkrar mínútur. Setjið ostinn og sýrða rjómann út á og leyfði sósunni að þykkna aðeins. Bragðið til með salti og pipar.
Blandið soðnu pastanu saman við ásamt afganginum af steinseljunni. Sefjið kjötbollurnar ofan á og berið fram. Það er ágætt að bera fram með nýrifnum parmesan.
Með þessu ítalskt rauðvín á borð við Col di Sasso frá Banfi.
